Актёр Шерзод Бин: Суратга олган фильмим профессионал эмас, бироқ унда томошабинга айтмоқчи бўлган гапларим бор

Актёр ва тақлидчи Шерзод Бин ўзини режиссёрликда синаб кўриб, «Қайсар ошиқлар» номли фильм суратга олди. Картина премьераси 23 сентябрь куни бўлиб ўтгани ҳақида аввал хабар берилган эди. Журналист Феруз Муҳаммад Шерзод Билан унинг янги ижодий тажрибаси ҳақида суҳбатлашди.

— Саволимни тўғри қабул қиласиз, деган умиддаман. Бугун кинода ҳаваскор режиссёрлар, уларнинг баъзан танқидга ҳам арзимайдиган фильмлари кўпайиб кетди. Сизни маҳоратли актёр сифатида биламиз, бироқ режиссура — умуман бошқа олам. Бу борада билим, тажрибам етарли, деб ҳисоблайсизми?— Институтда Эстрада актёрлиги факультетида таҳсил олганман. Бу факультетда жуда кўп соҳалар, хусусан, драматургия, режиссура, пантомимо кабилар бўйича мукаммал билим берилади. Режиссурани амалиётда, фильмларни тасвирга олиш жараёнида режиссёрлардан ўрганганман.

— «Ўзбеккино»даги Бадиий кенгашдан фильмларнинг ўтиши қийинлашиб кетган, Кенгаш томонидан фильмларга қўйилаётган талаблар қатъийлашган. Мазкур жараёнда қийинчиликлар бўлмадими?— Фильмимиз Бадиий кенгашдан ўтди. Премьерадан уч ойча аввал рухсат олинган эди. Асал Шодиева, Жаҳонгир Тўлқинов, Элёр Носиров, Раъно Ярашева, Муҳаммадисо Абдулхаиров, Лола Элтоева каби актёр-актрисалар суратга тушган фильмимизнинг ишчи номи «Учрашгунча» эди, кўплаб мухлисларимиз ҳам картинани шу ном билан билишади. Премьера арафасида унинг номи «Қайсар ошиқлар» деб ўзгартирилди. «Қайсар ошиқлар»ни профессионал даражадаги фильм дея олмайман, бироқ бу ишим орқали томошабинларга айтадиган гапларим кўп.

— Адашмасам, 2016 йилнинг иккинчи ярмида премьераси бўлиб ўтган бирорта фильмда кўринмадингиз. Бунинг сабаби нима: ролга таклиф йўқми ёки таклифларни рад этяпсизми?— Бунинг сабаби, аввало, тақдирдан деб ўйлайман. Очиғи, 2016 йилда бирорта фильмга таклиф қилишмади. 2015 йил охирида давлат буюртмасига асосан суратга олинадиган фильмлардан бирига, бош ролга таклиф қилишган эди, аммо саёҳат сабаб таклифни рад этгандим. Сўнгги вақтларда фақат клипларга таклиф бўлмоқда — 2016 йил бошидан бери, янглишмасам, 6—7 клипда суратга тушдим. Бундан ташқари, шу йил биринчи бор ўзим ҳам сценарийсини ёзиб, ҳам режиссёрлик қилган клипим мухлислар эътиборига ҳавола қилинди. Мазкур клип Ойбек ва Нигоранинг «Оппоғой» деб номланган қўшиғига ишланган эди. Бу клипдан сўнг жуда ҳам кўп хонандалардан таклифлар тушмоқда. Бугунги кунда асосан клиплар билан бандман.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.