Бир муддат аввал ОАВда хонанда Наргиз Зокированинг собиқ турмуш ўртоғи томонидан ёлланган қотил унга таҳдид қилиб, катта миқдорда пул сўраётгани ҳақида хабарлар тарқалган эди. Наргиз Зокирова атрофидаги сўнгги шов-шувларга аниқлик киритиш мақсадида, журналист Феруз Муҳаммад хонанданинг яқин қариндошларидан бири — актёр ва хонанда Жавоҳир Зокировга мурожаат қилди.
— Хонанда Наргиз Зокированинг собиқ турмуш ўртоғи уни ўлдириш учун киллер ёллагани, қотил бу ҳақда Наргизга маълум қилиб, телефон орқали берилган буюртма овози эвазига 200 минг рубл талаб қилгани ҳақида хабарлар тарқалган эди. Бу гап-сўзлар қанчалик рост?— Бундай маълумотлар ҳақида ҳеч қаерда ҳеч нарса ўқиганим йўқ. Наргиз билан гаплашганимда ҳам у ҳаётидаги бундай оғир вазиятлар ёки уни ўлдиришга ёлланган қотил ҳақида бирор нарса деганини эслай олмайман.
— Бир неча ой аввал Россияда ижодий сафарда бўлдингиз. Сафар вақтида Наргиз Зокирова билан тушган суратларингизни ижтимоий тармоқларда эълон қилгансиз. Наргиз Зокирова билан қандайдир ижодий ҳамкорликни йўлга қўйиш режалаштирилганми?— Ижодий ҳамкорликни йўлга қўйиш борасида унда ҳам, менда ҳам таклифлар бўлган. Лекин бу кўпчилик ўйлаганидек бирга қўшиқ куйлаш эмас. Ўйлаган ғоямизга жуда катта маблағ зарур, шунинг учун ҳозирча бу ҳақда жар солмаяпмиз. Агар режамизни амалга ошира олсак, бу жуда катта шов-шувга сабаб бўлиши аниқ.
— Бир суҳбатимизда «Наргиз жуда катта гонорар олади», деган эдингиз.— Адашмасам, бу маълумот Наргизнинг шахсий сайтида ҳам эълон қилинган бўлиши керак. У 45 дақиқалик чиқиши учун 25 минг доллар миқдорида гонарар олади. Қўшиқларни жонли ижрода куйлайди.
— Наргиз Зокирова сизнинг ижодингизга — ўйнаган фильмларингиз, куйлаётган қўшиқларингизга қандай муносабат билдиради?— Наргиз менинг актёрлик маҳоратимга ҳамиша юқори баҳо берган, фильмларим ҳақида ҳам худди шундай ижобий фикрда. Қўшиқларимга келсак, улар хусусида ҳам ҳеч қачон ёмон фикр билдирмаган.
— «Мирзо Улуғбек» номли тарихий фильмда суратга тушдингиз, аммо фильм премераси ҳақида ҳеч қандай маълумот йўқ.— Бу фильм тайёр бўлганидан хабарим бор, аммо премераси қачон бўлиши, мухлислар сингари, менга ҳам қоронғу.
— Театрдан таклифлар тушаётгани, лекин ҳозирча иккиланиб турганингиз ҳақида айтгандингиз. Бу йўналишда бирор янгилик бўлмадими ҳали?— Бир қарорга келдим. Ҳозирча режиссёр Баҳодир Йўлдошев раҳбарлигидаги «Дийдор» театр-студиясида «Юлдузли тунлар» спектаклида кичкина бир ролни ижро этяпман. Лекин бу ҳали бошланиши, албатта.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)