Жаҳонгир Отажонов тўйга қимматга чиқиши сабаблари ва концертдан оладиган фойдаси ҳақида маълум қилди

Жорий йилнинг июнь ойида «Истиқлол» санъат саройида ўзининг «Иштибоҳ» номли яккахон концерт дастурини тақдим этган хонанда Жаҳонгир Отажонов орадан 4 ой ўтиб ўзининг янги концерт дастури ҳақида эълон қилди ва ушбу муносабат билан 3 октябрь куни «Ёшлар ижод саройи»да журналистлар учун матбуот анжумани ўтказди, деб хабар бермоқда «Даракчи.uz».

Жаҳонгир Отажонов тадбир давомида журналистларни қизиқтирган саволларга жавоб бериб, бир йил ҳисобидан иккинчи концертни тақдим этишга жазм қилгани ҳақида гапирди.

«Сўнгги 15–20 йил давомида ижод қилаётган санъаткорлар бир неча кунлаб концерт беришаётганини гувоҳи бўляпман, тўғриси, мен ҳам айнан шундай қилгим келади. Лекин уч кундан кейин овозимнинг сифати қочишни бошлайди, шу сабабдан бундан кўп концерт бермайман. Тўғри, овозни сифати қочаётганини мухлис сезмаслиги мумкин, аммо ташриф буюраётган томошабинни сифатсиз маҳсулот билан алдай олмайман. Шу сабабдан ёзда берган концерт дастуримдан сўнг, янги ашулалар ёза олсам, кузда яна концерт қиламан, шунда мен ҳам бир йилда 5–6 кун концерт берган бўламан, деб ният қилгандим. Агар насиб қилса, кейинги дастуримни март ойида ҳам мухлисларимга ҳавола этаман. Кейинчалик эса ҳар чоракда концерт бериб, мухлисларим билан учрашиш ниятим бор», – деди хонанда.

Жаҳонгир Отажонов тўй хизматларига қимматга чиқадиган санъаткорлардан бири ҳисобланади. Бунинг сабабини эса хонанданинг ўзи қуйидагича изоҳлади.

«Тўйга ҳам айнан мана шу сабабли қиммат нарх айтаман, биринчидан меҳнатим оғир, иккинчидан нархни қиммат айтганим ҳисобига тўйга камроқ бораман, яъни атайлаб тўйларим камайиши учун нархни қиммат қўйганман. Агар тез-тез тўйга чиқадиган бўлсам, овозимнинг сифати қочади, кейин фонограмма куйлашга мажбур бўламан. Мени жонли ижро айтади деб чақирган одам эса бундан оғриниши мумкин. Шу сабабдан сунъий равишда нархимни баланд қилганман. Тўйга кам чиққаним сабабли шоу-бизнесдаги харажатларимни қоплаш учун концертдан пул тушириш истагим бор», – деди Отажонов.

Аксарият санъаткорлар концертдан фойда олмаслигини айтади, бироқ Жаҳонгир Отажонов бунинг аксини таъкидлади.

«Тўғри концерт харажатлари кичкина эмас. Қилмаслик иложсиз бўлган харажатлари бор. Мени олдимга қўйган аниқ стратегия бор: концертимга тушган мухлис кейинги концертимга ҳам келишини ҳисобга оламан ва шунга интиламан. 2 кунда 8 минг одам тушса яна шунча одам кейинги сафар ҳам қайтиб келиши керак, бунинг учун эса кирган томошабин концертдан маънавий озуқа, лаззат олиб чиқиб кетишини таъминлаш шарт. Концерт фаолиятимни бошлаганимга 5 йилдан кўп вақт бўлган бўлса, айтишим мумкинки, концертларимдан ўзига яраша фойда кўрсам кўраманки, зарар кўрмайман. Бунинг сабаби эҳтимол рекламага катта пул сарфламаганимдадир. Реклама қилмаганимнинг сабаби рекламага муҳтож эмаслигимда эмас, албатта. Шунчаки юқорида айтганимдай концерт қилаётганимда аввалги концертимга тушган одам албатта келишига ишонаман», – дея таъкидлади Жаҳонгир Отажонов.

Эслатиб ўтамиз, хонанда Жаҳонгир Отажонов 28–29 октябрь кунлари «Истиқлол» санъат саройида ўзининг янги «Куз гуллари» деб номланган жонли ижродаги концерт дастурини тақдим этади.