Joriy yilning iyun oyida “Istiqlol” san’at saroyida o‘zining “Ishtiboh” nomli yakkaxon konsert dasturini taqdim etgan xonanda Jahongir Otajonov oradan 4 oy o‘tib o‘zining yangi konsert dasturi haqida e’lon qildi va ushbu munosabat bilan 3-oktabr kuni “Yoshlar ijod saroyi”da jurnalistlar uchun matbuot anjumani o‘tkazdi, deb xabar bermoqda “Darakchi.uz”.
Jahongir Otajonov tadbir davomida jurnalistlarni qiziqtirgan savollarga javob berib, bir yil hisobidan ikkinchi konsertni taqdim etishga jazm qilgani haqida gapirdi.
“So‘nggi 15–20 yil davomida ijod qilayotgan san’atkorlar bir necha kunlab konsert berishayotganini guvohi bo‘lyapman, to‘g‘risi, men ham aynan shunday qilgim keladi. Lekin uch kundan keyin ovozimning sifati qochishni boshlaydi, shu sababdan bundan ko‘p konsert bermayman. To‘g‘ri, ovozni sifati qochayotganini muxlis sezmasligi mumkin, ammo tashrif buyurayotgan tomoshabinni sifatsiz mahsulot bilan alday olmayman. Shu sababdan yozda bergan konsert dasturimdan so‘ng, yangi ashulalar yoza olsam, kuzda yana konsert qilaman, shunda men ham bir yilda 5–6 kun konsert bergan bo‘laman, deb niyat qilgandim. Agar nasib qilsa, keyingi dasturimni mart oyida ham muxlislarimga havola etaman. Keyinchalik esa har chorakda konsert berib, muxlislarim bilan uchrashish niyatim bor”, – dedi xonanda.
Jahongir Otajonov to‘y xizmatlariga qimmatga chiqadigan san’atkorlardan biri hisoblanadi. Buning sababini esa xonandaning o‘zi quyidagicha izohladi.
“To‘yga ham aynan mana shu sababli qimmat narx aytaman, birinchidan mehnatim og‘ir, ikkinchidan narxni qimmat aytganim hisobiga to‘yga kamroq boraman, ya’ni ataylab to‘ylarim kamayishi uchun narxni qimmat qo‘yganman. Agar tez-tez to‘yga chiqadigan bo‘lsam, ovozimning sifati qochadi, keyin fonogramma kuylashga majbur bo‘laman. Meni jonli ijro aytadi deb chaqirgan odam esa bundan og‘rinishi mumkin. Shu sababdan sun’iy ravishda narximni baland qilganman. To‘yga kam chiqqanim sababli shou-biznesdagi xarajatlarimni qoplash uchun konsertdan pul tushirish istagim bor”, – dedi Otajonov.
Aksariyat san’atkorlar konsertdan foyda olmasligini aytadi, biroq Jahongir Otajonov buning aksini ta’kidladi.
“To‘g‘ri konsert xarajatlari kichkina emas. Qilmaslik ilojsiz bo‘lgan xarajatlari bor. Meni oldimga qo‘ygan aniq strategiya bor: konsertimga tushgan muxlis keyingi konsertimga ham kelishini hisobga olaman va shunga intilaman. 2 kunda 8 ming odam tushsa yana shuncha odam keyingi safar ham qaytib kelishi kerak, buning uchun esa kirgan tomoshabin konsertdan ma’naviy ozuqa, lazzat olib chiqib ketishini ta’minlash shart. Konsert faoliyatimni boshlaganimga 5 yildan ko‘p vaqt bo‘lgan bo‘lsa, aytishim mumkinki, konsertlarimdan o‘ziga yarasha foyda ko‘rsam ko‘ramanki, zarar ko‘rmayman. Buning sababi ehtimol reklamaga katta pul sarflamaganimdadir. Reklama qilmaganimning sababi reklamaga muhtoj emasligimda emas, albatta. Shunchaki yuqorida aytganimday konsert qilayotganimda avvalgi konsertimga tushgan odam albatta kelishiga ishonaman”, – deya ta’kidladi Jahongir Otajonov.
Eslatib o‘tamiz, xonanda Jahongir Otajonov 28–29-oktabr kunlari “Istiqlol” san’at saroyida o‘zining yangi “Kuz gullari” deb nomlangan jonli ijrodagi konsert dasturini taqdim etadi.
Izoh (0)