Актриса Анжелина Жоли турмуш ўртоғи, актёр Брэд Питт билан келишув доирасида 20 октябрга қадар 6 фарзанди устидан васийлик ҳуқуқини қўлга киритди. Шунингдек, Питт наркотик ва алкогол бўйича текширувдан ҳам ўтади. Бу ҳақда «РБК» хабар бермоқда.
TMZ нашрига кўра, Жоли ва Питт Лос-Анжелес округи оила ва болалар ишлари бошқармаси тавсияларига риоя этишга рози бўлди. Жумладан, уларнинг иккови учун ҳам индивидуал консултациялар ўтказилади. Брэднинг болалар билан биринчи учрашуви эса терапевт иштирокида бўлиб ўтади.
Reuters агентлигининг билдиришича, болалар устидан тўлиқ васийлик кимга берилиши ҳақида ҳозирча бир тўхтамга келинмади.
20 сентябрь куни Анжелина Жолининг адвокати унинг мижози Брэд Питт билан ажрашмоқчи эканини тасдиқлади. Никоҳни бекор қилиш учун асос сифатида актриса эри билан, хусусан, болаларни тарбиялаш масаласида жиддий ихтилофдалигини билдирган.
Маълумот учун, 2004 йилдан буён учрашиб юрган Жоли ва Питт 2014 йилда никоҳдан ўтган эди. Жуфтлик уч фарзанд кўрган, шунингдек, уч болани асраб олган.
Изоҳ (0)