Ўзбекистон Олий Мажлиси Қонунчилик палатаси депутатлари 29 сентябрь куни мамлакат меҳнат вазири Азиз Абдуҳакимовнинг ахборотини тинглади. ЎзА ахборотига кўра, парламентдаги Халқ демократик партияси фракцияси ташаббуси билан ташкил этилган эшитувда вазирнинг Ўзбекистонда 2016 йилда иш ўринлари ташкил этиш ва аҳоли бандлигини таъминлаш дастури бажарилишининг бориши тўғрисидаги ахбороти тингланган.
Эшитув давомида Меҳнат вазирлигининг минтақалар ва корхоналар кесимида Бандлик дастури амалга оширилиши мониторинги ва таҳлилини ўтказишга доир фаолияти, меҳнат бозорида талаб ва таклифни ўрганиш натижалари ҳамда 2016 йил учун тасдиқланган кўрсаткичларни бажариш юзасидан унинг асосида қабул қилинган зарур қўшимча чора-тадбирлар, янги ташкил этилаётган иш ўринлари хусусидаги кўрсаткичларнинг тўғрилиги устидан назоратни кучайтириш бўйича Давлат статистика қўмитаси билан ҳамкорликдаги ишлари тўғрисидаги ахборот тақдим этилди.
Саноат, хизматлар кўрсатиш ва сервис соҳаси, қурилиш, кичик бизнес, фермер ва деҳқон хўжаликларининг жадал ривожланганлиги жорий йилнинг январь июнь ойларида 462,5 минг кишининг бандлигини таъминлаш имконини берди. Иш ўринларининг 59,8 фоизи қишлоқ жойларида ташкил этилди.
Иш билан банд бўлмаган аҳоли вакилларига бўш иш ўринлари ярмаркаларини ўтказиш орқали кўмак кўрсатилди. Натижада бандликка кўмаклашиш туман ва шаҳар марказлари томонидан ишга жойлаштириш юзасидан мурожаат қилган 124,6 минг фуқаро доимий ва вақтинчалик иш билан таъминланди, 52,6 минг фуқарога меҳнатга оид қонун ҳужжатлари бўйича ҳамда ишга жойлашиш имкониятлари хусусида ахборот ва маслаҳатлар берилди.
Депутатлар Меҳнат вазирлиги ахборотини ижобий баҳолаган ҳолда, Дастурнинг бажарилиши юзасидан мониторинг ва таҳлил тизимини такомиллаштириш, Меҳнат вазирлигининг бошқа тегишли давлат органлари ҳамда маҳаллий давлат ҳокимияти органлари билан ҳамкорлигини яхшилаш зарурлигини таъкидлаб ўтди.
Эшитув якунларига кўра, муҳокама давомида билдирилган фикр-мулоҳазаларни инобатга олган ҳолда, Қонунчилик палатаси тегишли қарор қабул қилган.
Изоҳ (0)