O‘zbekiston Oliy Majlisi Qonunchilik palatasi deputatlari 29-sentabr kuni mamlakat mehnat vaziri Aziz Abduhakimovning axborotini tingladi. O‘zA axborotiga ko‘ra, parlamentdagi Xalq demokratik partiyasi fraksiyasi tashabbusi bilan tashkil etilgan eshituvda vazirning O‘zbekistonda 2016-yilda ish o‘rinlari tashkil etish va aholi bandligini ta’minlash dasturi bajarilishining borishi to‘g‘risidagi axboroti tinglangan.
Eshituv davomida Mehnat vazirligining mintaqalar va korxonalar kesimida Bandlik dasturi amalga oshirilishi monitoringi va tahlilini o‘tkazishga doir faoliyati, mehnat bozorida talab va taklifni o‘rganish natijalari hamda 2016-yil uchun tasdiqlangan ko‘rsatkichlarni bajarish yuzasidan uning asosida qabul qilingan zarur qo‘shimcha chora-tadbirlar, yangi tashkil etilayotgan ish o‘rinlari xususidagi ko‘rsatkichlarning to‘g‘riligi ustidan nazoratni kuchaytirish bo‘yicha Davlat statistika qo‘mitasi bilan hamkorlikdagi ishlari to‘g‘risidagi axborot taqdim etildi.
Sanoat, xizmatlar ko‘rsatish va servis sohasi, qurilish, kichik biznes, fermer va dehqon xo‘jaliklarining jadal rivojlanganligi joriy yilning yanvar-iyun oylarida 462,5 ming kishining bandligini ta’minlash imkonini berdi. Ish o‘rinlarining 59,8 foizi qishloq joylarida tashkil etildi.
Ish bilan band bo‘lmagan aholi vakillariga bo‘sh ish o‘rinlari yarmarkalarini o‘tkazish orqali ko‘mak ko‘rsatildi. Natijada bandlikka ko‘maklashish tuman va shahar markazlari tomonidan ishga joylashtirish yuzasidan murojaat qilgan 124,6 ming fuqaro doimiy va vaqtinchalik ish bilan ta’minlandi, 52,6 ming fuqaroga mehnatga oid qonun hujjatlari bo‘yicha hamda ishga joylashish imkoniyatlari xususida axborot va maslahatlar berildi.
Deputatlar Mehnat vazirligi axborotini ijobiy baholagan holda, Dasturning bajarilishi yuzasidan monitoring va tahlil tizimini takomillashtirish, Mehnat vazirligining boshqa tegishli davlat organlari hamda mahalliy davlat hokimiyati organlari bilan hamkorligini yaxshilash zarurligini ta’kidlab o‘tdi.
Eshituv yakunlariga ko‘ra, muhokama davomida bildirilgan fikr-mulohazalarni inobatga olgan holda, Qonunchilik palatasi tegishli qaror qabul qilgan.
Izoh (0)