29 сентябрь куни Тожикистон президенти Эмомали Раҳмон Душанбе шаҳрига ишчи ташриф билан келган Ўзбекистон Ташқи ишлар вазири Абдулазиз Камиловни қабул қилди. Бу ҳақда Тожикистон Республикаси Президенти расмий сайтида хабар берилди.
Бўлиб ўтган суҳбатда томонлар тожик-ўзбек алоқаларининг ҳозирги ҳолати ва истиқболларини муҳокама қилди, уларни янада кенгайтириш йўлларини кўриб чиқди.
Бугунги кунда икки мамлакат ҳамкорлигининг маданий-гуманитар таркибини кучайтиришга бўлган реал эҳтиёж қайд этилди. Томонлар долзарб минтақавий ва халқаро муаммоларни муҳокама қилиб, Марказий Осиёдаги ижтимоий-сиёсий барқарорликнинг асосий шарти сифатида минтақавий хавфсизликни таъминлаш аҳамиятига эътибор қаратди.
Иқтисодий ва савдо ҳамкорлиги даражасини ошириш энг муҳим масала сифатида белгилаб олинди. Шунингдек, сув-энергетика ва транспорт-логистика соҳалари конструктив ҳамкорлик қилиш талаб этиладиган йўналишлар сифатида қайд этилди.
Изоҳ (0)