Ўзбекистон Маъмурий жавобгарлик тўғрисидаги кодексига йўл ҳаракати қоидаларини бузган пиёдалар учун жарималарни кўзда тутувчи қўшимча киритилди. «Газета.uz» хабарига кўра, Ўзбекистон Президенти вазифасини бажарувчи Шавкат Мирзиёев ўзгартишлар киритиш тўғрисидаги Қонунга 23 сентябрь куни имзо чеккан, ўзгаришлар 24 сентябрдан кучга кирган.
Янгиланган 138-моддага мувофиқ, йўлнинг ҳаракатдаги қисмида, шу жумладан, пиёдалар ўтиш йўлида телефондан фойдаланиш, китоб ёки даврий нашрларни ўқиш, видеоматериаллар томоша қилиш ёки аудиоматериалларни эшитиш ва диққатни жалб қиладиган бошқа электрон воситалардан фойдаланиш энг кам иш ҳақи (ЭКИҲ)нинг учдан бир қисми (1 октябрдан — 49 925 сўм) миқдорида жарима белгиланишига сабаб бўлади.
Бундан ташқари, йўловчиларнинг ҳаракатланиб кетаётган транспорт воситасидан тана қисмларини (қўлдан ташқари) чиқаргани учун ҳам жарима миқдори белгиланди. Мазкур қоидабузарлик ЭКИҲнинг 1 баробари (1 октябрдан 149 775 сўм) миқдоридаги жаримага сабаб бўлади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)