Ўзбекистон Президенти вазифасини бажарувчи Шавкат Мирзиёев «Ўзбекистон Республикасининг фуқаролиги тўғрисида»ги Қонунга киритилган тузатишларни имзолади. Бу ҳақда «Газета.uz» хабар бермоқда.
Қонуннинг янгиланган 21-моддасига кўра, чет эл фуқаролигини қабул қилган шахс 30 кун давомида бу ҳақда ички ишлар идоралари ёки Ўзбекистоннинг консуллик муассасаларига маълум қилиши лозим.
Ўзгартириш киритилган 26-моддага асосан, Ўзбекистон фуқаролари (ёки фуқаролиги бўлган эр-хотиннинг бири) томонидан фарзандликка олинган чет эл фуқароси хорижий давлат фуқаролигидан чиққан тақдирдагина Ўзбекистон фуқаролигига қабул қилинади.
Аввалгидек, Ўзбекистон фуқаролиги қуйидаги ҳолатларда йўқотилиши мумкин:
- чет давлатда ҳарбий хизмат, хавфсизлик хизмати, полиция, адлия идоралари ёки давлат ҳокимияти ва бошқарувининг бошқа идораларига ишга кирилиши;
- хорижда доимий яшовчи шахснинг беш йил давомида узрли сабабларсиз консуллик ҳисобида турмаслиги;
- Ўзбекистон фуқаролигининг ёлғон маълумотлар ёки сохта ҳужжатлар тақдим этиш асосида олингани;
- хорижий давлат фойдасини кўзлаб фаолият кўрсатиш ёки тинчлик ва хавфсизликка қарши жиноятлар содир этиш орқали жамият ҳамда давлат манфаатларига жиддий зарар етказилиши.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)