Халқаро футбол федерацияси (ФИФА)нинг Тиббиёт департаменти Россия футбол иттифоқи (РФИ)дан Халқаро антидопинг агентлиги (WADA) мустақил комиссияси раҳбари Ричард Макларен ҳисоботида допинг намунаси ижобий деб кўрсатилган россиялик футболчилар ҳақида етмаётган маълумотларни тақдим қилишни сўради. Бу ҳақда «Газета.ru» хабар бермоқда.
«Биз Макларендан 11 нафар (россиялик) футболчининг допинг намунаси ижобий чиққани ҳақида маълумот олдик. Суриштирув ишлари давом этмоқда. Яқинда ‘Ростов’ футболчилари намунасида мельдоний борлиги ҳақидаги миш-мишларга аниқлик киритиш учун Россияга ташриф буюрдик ва жамоа Москвада ўйнаганида допинг назорат ўтказдик. Бизнинг ишимиз ана шундан иборат», – деб ФИФА Тиббиёт департаменти раҳбари Жири Дворак сўзларидан иқтибос келтиради «ТАСС».
«Мен Маклареннинг суриштируви ҳақида ҳеч қандай изоҳ бера олмайман. Мен ҳисоботда келтирилган тиббий хулосаларга жавоб бераман. Айтишим мумкинки, РФИдан барча керакли маълумотларни сўрадик. Батафсил маълумотларни Россия антидопинг агентлиги (РУСАДА)дан олишингиз мумкин.
Ижобий допинг намунаси билан тушган футболчилар ҳақида маълумот Макларен ҳисоботида келтирилган. Икки футболчи тестостерон билан тутилган: бири марихуана билан, бошқаси гормонлар билан боғлиқ. Яна бири ҳақида аниқ маълумот йўқ. Қолган ишларга келадиган бўлсак, у ерда қандайдир маълумотлар йўқ ва биз ўша маълумотларнинг ҳам тақдим этилишини сўрадик», – дея аниқлик киритди Дворак.
Аввалроқ WADA мустақил комиссияси раҳбари ҳисоботида Россия футболида ижобий допинг намуналари яширилган 11 нафар россиялик футболчининг маълумотлари тақдим этилгани ҳамда бу иш юзасидан суриштирув бошлангани ҳақида хабар қилинганди.
Кейинроқ Россия спорт вазири Виталий Мутко шубҳали 11 та допинг намунадан 9 таси салбий чиққани ҳақида айтиб ўтганди.
Изоҳ (0)