Ўзбекистон футзал терма жамоаси Жаҳон Чемпионатининг 2-турида Колумбия билан 3:3 ҳисобида дуранг ўйнагач, бош мураббий Хосе Мария Мендес ғалаба қўлдан бой берилганидан афсусда эканини айтиб ўтди.
«Бугун яхши ўйин намойиш этдик. Колумбиядек кучли жамоа билан дуранг ўйнаш ҳар кимга ҳам насиб қилмайди. Бироқ ғалабани қўлдан бой берганимиздан афсусдаман», — деб испаниялик мутахассиснинг сўзларидан иқтибос келтирди ЎФФнинг Тегелгамъдаги канали.
«Мағлубият гуруҳдан чиқиш имкониятимизни йўққа чиқарарди. Буни тушуниб, қийин ўйинга тайёргарлик кўрдик. Ғалабани қаттиқ истагандик. Лекин ўйин охирида омад етишмади», — деб айтиб ўтган Артур Юнусов «Championat.asia» сайтига берган интервьюсида.
«Панама билан ўйиндан кейин кайфиятимиз тушиб кетганди, қаттиқ ҳафа эдик, — деб сўз бошлади Нодир Элибоев. — Колумбияга қарши ўйин олдидан эса йигитлар билан ўзаро гаплашиб олиб, фақат ғалаба учун чиққандик. Эътибор берган бўлсангиз, ҳакамлар мезбонларга барибир ёрдам қилди. Уларнинг сўнгги икки голи эса омаддан бошқа нарса эмас».
Нодир Элибоев бош мураббий Хосе Мария Мендес учрашув олдидан ўзбекистонлик футзалчиларга қандай кўрсатма бергани ҳақида ҳам тўхталди: «Биринчи голни уриб олсак, мезбонлар ҳисобни тенглаштириш учун шошиб қолади. Мана шунда биз уларни қарши ҳужумда ушлаймиз деганди».
«Майдонда томошабинлар жуда кўп эди. Биз уларга эътибор қаратмадик, ўз уйимизда ўйнаётгандек тасаввур ҳосил қилдик. Рақиб дарвозасига иккита гол уриб олганимиз, кучимизга бўлган ишончни оширди. Улар бешинчи ўйинчини ҳам майдонга туширганида, биз бўш қолган дарвозани ишғол қилишимиз мумкин эди. Аммо вазиятдан фойдалана олмадик. Бу аламли дуранг бўлди», — деб таъкидлади дарвозабон Рустам Умаров.
«Бундан фожеа ясамаслигимиз керак. Олдимизда яна 1 та ўйин бор. Насиб қилса гуруҳдан чиқамиз», — деб сўзини тугатди ўзбекистонлик посбон уни олдинда Португалияга қарши учрашув кутиб турган бир вақтда.
Изоҳ (0)