Шимолий Корея ўз тарихидаги энг йирик ядровий синовларни ўтказганини эълон қилди

КХДР ўз тарихидаги энг кучли атом бомбаси синовларини ўтказди, дея хабар бермоқда Meduza.

Бу синовлар ҳақида дастлаб Жанубий Корея ва Япония ҳукуматлари хабар берди, кейинроқ Пхеньяннинг ўзи бу хабарларни расман тасдиқлади.

Шимолий Корея телевидениеси орқали ўқиб эшиттирилган баёнотда таъкидланишича, КХДР энди баллистик ракеталарни ядровий каллаклар билан таъминлашга қодир.

Россия Мудофаа вазирлиги ахборотига кўра, Шимолий Кореяда синалган ядровий бомбанинг қуввати тахминан 10 килотоннага яқин.

9 сентябрь куни портлатилган ядровий бомба КХДР тарихидаги бешинчи ядро синови бўлди. Тахминларга кўра, мазкур синовлар Шимолий Корея ташкил этилгани билан боғлиқ байрам тантаналарига бағишланган.

«Жанубий Корея президент Пак Кин Хенинг таъкидлашича, КХДР етакчиси Ким Чен Ин жаҳон ҳамжамиятининг ядровий дастурдан воз кечиш ҳақидаги чақириқларига қарамай, ‘васвасага тушганча ўйламай иш қилишда’ давом этмоқда», — дейилади Reuters ахборотида.

Шимолий Корея ядро қуролига эга экани ҳақида 2005 йили эълон қилган, 2006 йили эса биринчи марта ядровий синовларни ўтказган эди. Мазкур синовлар сабаб, мамлакат халқаро санкциялар таъсири остида қолган.

Пхеньян иқтисодий ёрдам ва санкцияларни бекор қилиш эвазига ўз ядровий дастурини тўхтатиш бўйича бир неча бор музокаралар бошлаган. Бироқ музокараларга уринишлар ҳозирча натижа бергани йўқ, КХДР эса ядровий синовларни ўтказишда давом этмоқда, бунга жавобан эса янги санкциялар жорий этилмоқда.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.