LG компанияси янги LG V20 мусиқий флагманини расман тақдим этди, деб ёзади «Hi-tech.mail.ru». Смартфон билдиришномалар чиқиб турадиган қўшимча экран, қўш камера ва овоз имкониятларини кенгайтириш учун рақамли-аналогли ўзгартиргичга эга бўлди.
LG V20 айнан рақамли-аналогли ўзгартиргич туфайли мусиқий флагман деб аталади. Бундан ташқари, у яп-янги Android 7.0 Nougat операцион тизимида чиқарилган биринчи смартфондир.
Қурилма Quad Hi-Fi Audio’ни қўллаб-қувватлайди, акустик тизим Bang&Olufsen билан ҳамкорликда ишлаб чиқилган. Модул рақамли ахборотни карнайлар, динамиклар ёки наушниклар учун аналогли сигналга айлантиради. Натижада фойдаланувчи аудиони сифати йўқолмаган ва ҳажми кичрайтирилмаган ҳолатда эшитади.
Қўшимча экран билдиришномалар чиқиб туриши учун зарур, бу смартфон энергиясини тежаш имконини беради.
Смартфонга Qualcomm Snapdragon 820 чипсети, 4 Гб тезкор ва 64 Гб ички хотира (+microSD, 2 терабайтгача), 5,7 дюймли ва 2560×1440 пикселли асосий экран ҳамда 2,1 дюймли ва 160×1040 пикселли қўшимча экран, 16 мегапиксел ва 8 мегапикселли қўш камера, 5 мегапикселли олд камера, 3200 мА/соат сиғимли аккумулятор ўрнатилди.
Изоҳ (0)