Apple компанияси «ақлли» соатлар иккинчи авлодини расман тақдим этди, деб ёзади «Hi-tech.mail.ru». Apple Watch 2 дизайни олдинги авлод гаджети дизайнидан кўп ҳам фарқ қилмайди — урғу функционал имкониятларни кенгайтиришга берилди.
Соат аввалгидек тўртбурчак экранга эга, аммо бироз нафисроқ ва замонавийроқ кўринишга келди. Қурилма пўлат, тўқ кулранг пўлат, алюминий, тўқ кулранг алюминий, тилларанг, пушти тилларангда мавжуд, шунингдек, сополдан ясалган янги модель ҳам пайдо бўлди. Корпус соат ичига сув киришидан тамомила ҳимояланган, у 50 метргача чуқурликдаги сувдан омон чиқади.
Шунингдек, югуриш билан шуғулланадиган спортчилар учун соатнинг Apple Watch 2 Nike+махсус версияси чиқарилади.
Apple Watch 2 олдингидек, икки хил ҳажмда — 38 ва 42 миллиметрли экранлар билан етказиб берилади. Пикселлар ҳам ўзгармаган: мос равишда 272×340 ва 312×390 пикселли.
Apple Watch 2 iPhone’дан анча мустақил бўлди. Унга ўрнатилган GPS-модул гаджетга мустақил равишда ва етарлича аниқликда қурилма эгасининг жойлашган ўрнини харитадан топиш, босиб ўтилган йўл ва масофани ҳисоблаш имкониятини беради.
Бундан ташқари, Apple Watch 2 ҳар қандай Wi-Fi тармоғига улана олади (авваллари фақат ўзи бириктирилган iPhone фойдаланган тармоқларга уланарди). Find My Watch функцияси Wi-Fi-роутерлар сигналларини триангуляция қилиш орқали қурилмани қидириб топади.
Аммо Apple Watch 2 орқали қўнғироқ қилиш ва қабул қилишни ҳамон смартфонсиз амалга ошириб бўлмайди.
Янги «ақлли» соатга сиғими катталаштирилган аккумулятор ўрнатилди, миш-мишларга кўра, у 334 мА/соатга тенг (аввал — 245 мА/соат). Қурилма янги, S2 процессори билан жиҳозланди, у қарийб икки марта унумлироқ. Ички хотираси ҳажми — 8 Гб.
Apple Watch 2 ўзи билан бир вақтда тақдим этилган янги watchOS 3 операцион тизимида ишлайди. Классик Apple Watch 2 АҚШда 369 доллар (минимал версияси)дан сотилади. Сотув 16 сентябрдан бошланади.
Изоҳ (0)