Венесуэладаги иқтисодий инқироз Каракас ва бошқа шаҳарлар кўчаларида уйсиз мушуклар ва итларнинг кескин кўпайиб кетишига олиб келди. «РБК»нинг AP’га таяниб маълум қилишича, охирги ойларда итлар емишининг нархи икки баробар ўсгани, айни пайтда бундай емишнинг бир фунти камида 2 доллар (кўпчилик венесуэлаликларнинг бир кунлик даромади) тургани боис одамлар итлар ва мушуклардан қутулмоқда.
Одатда жониворлар шунчаки кўчага ташлаб кетилади. Пойтахт кўчаларида озиб кетган итлар ва мушуклар жуда кўп учрайди. Уй жониворига меҳр қўйган инсонлар уларни расмий бошпаналарга топширмоқда.
Бошпаналар тўлиб кетгани боис бундай муассасалар раҳбарияти махсус курслар ташкил этиб, ит ва мушук эгаларига қимматлашиб кетган емишни қандай қилиб арзонроқ озиқ-овқат билан алмаштиришни ўргата бошлади. Энг машҳур муқобиллардан бирига парранда емиши айланди, аммо охирги кунларда унинг ҳам нархи оша бошлади. Шу сабабдан жониворларига қаттиқ меҳр қўйганлар ҳам уларни топширишга ёки қўйиб юборишга мажбур бўлмоқда.
Изоҳ (0)