ИШИД террорчилик ташкилоти 5 сентябрь, душанба куни Сурияда юз берган кетма-кет терактлар учун жавобгарликни ўз зиммасига олди. Бу ҳақда, Reuters’га асосланиб, «РИА Новости» агентлиги хабар бермоқда.
Хабар беришларича, душанба куни тонгда Дамашқ, Тартус, Хомс ва Ҳасака шаҳарларида худкушлар воситасида олтита портлаш амалга оширилди. Сўнгги маълумотларга кўра, қурбонлар сони 50 дан ортиқ.
Аввалроқ ИШИД Ҳасакадаги теракт учун жавобгарликни ўз зиммасига олгани ҳақида хабар берилган эди.
Суриялик бир қатор экспертларнинг фикрича, Суриядаги кетма-кет терактлар ҳукумат кучларининг Алепподаги муваффақиятларига жавоб муносабати бўлиши мумкин. 4 сентябрь, якшанба куни Сурия армияси Алеппо жанубидаги ҳарбий билим юрти биносини тўлиқ озод қилган эди.
Сурияда 2011 йил мартидан бери қуролли низо давом этмоқда. БМТ маълумотларига кўра, мамлакатда тўқнашувлар бошланганидан бери 220 мингдан ортиқ одам ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)