Япониянинг Kansai Electric Power (KEPCO) компанияси мутахассислари Фукуи префектурасидаги «Такахама» атом электр станцияси учинчи реакторидан ядровий ёнилғини чиқариб олишни бошлади. «ТАСС» ахборотига кўра, 157 та ёнилғи таёқчалари 7 сентябрга қадар реактордан чиқариб олинади.
«Такахама»нинг учинчи реактори 2016 йил январида қайта ишга туширилган эди, бироқ маҳаллий аҳолининг даъвосини қондирган суд қарорига мувофиқ у 10 март куни яна ўчирилди.
Станция яқинида истиқомат қилувчи одамларнинг фикрича, иншоот кучли зилзила ва цунамиларга етарлича тайёрланмаган, шунингдек, фавқулодда вазият юз берганида аҳолини хавфсиз ҳудудга кўчириш бўйича батафсил режалар йўқ.
«Фукусима-1» АЭСда 2011 йили юз берган аварияга қадар, Японияда ишлаб чиқариладиган электр энергиянинг 30 фоизи атом қувватларига тўғри келарди. Авариядан сўнг асосий юклама иссиқлик электр станцияларига тушди.
Ҳозирги вақтда Япония ҳукумати АЭСлар фаолиятини босқичма-босқич қайта тиклаш режаларини ишлаб чиқиш ҳаракатида, бироқ мамлакатнинг аксарият аҳолиси бу ташаббусга қарши.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)