Чеченистон раҳбари вазифасини вақтинчалик бажарувчи Рамзан Қодиров 27 август куни юз берган офат натижасида уйлари зарар кўрган эҳтиёжманд кишиларга кўмак беришни буюрди. Бу ҳақда у Instagram саҳифасида маълум қилди, деб ёзади «ТАСС».
«Бир неча кундан кейин янги ўқув йили бошланишини ҳисобга олиб, зарар етган мактабларни энг қисқа муддатларда қайта тиклаш керак. Албатта, соғлиқни сақлаш объектлари алоҳида назоратда бўлиши керак. Шунингдек, жабрланганлар орасида энг эҳтиёжмандларини аниқлаб, уларга вайрон бўлган уйларини тиклашда моддий ёрдам бериш керак», — дея қайд этди Қодиров.
Унинг сўзларига кўра, кучли ёмғир, шиддатли шамол ва дўл натижасида тўртта туманда вайронагарчиликлар юзага келган. «372 та уй, шу жумладан, 27 та кўп хонадонли уй тўлиқ ёки қисман вайрон бўлди. 22 та ижтимоий аҳамиятга эга бино — мактаблар, масжидлар, болалар боғчалари, касалхоналар, Маданият уйлари, ОТМлар, шунингдек, ўнта инфратузилма объекти зарар кўрди», — дейилади Қодировнинг хабарида.
Жала, шиддатли ёмғир ва дўл Чеченистонда 27 август куни кузатилди. Офат натижасида бир киши жароҳат олиб, вафот этди, яна уч киши стационар даволанишда. Айни пайтда республикада фавқулодда вазият режими жорий қилинган.
Аввалроқ Рамзан Қодиров республикада табиий офат — шиддатли шамол ва момақалдироқли ёмғир оқибатларини бартараф этиш учун тезкор штаб ташкил этган эди.
Изоҳ (0)