КХДР «Вашингтоннинг ядровий гегемонлигига қарши туриш учун зарбдор ядро воситаларини кучайтиради». Бу ҳақда мамлакат ташқи ишлар вазирлиги вакили тарқатган баёнотга таяниб, «ТАСС» хабар берди.
Дипломат БМТ Хавфсизлик кенгашининг АҚШ ва унинг тарафдорлари ташаббусига кўра 24 август куни КХДР сув ости кемасидан баллистик ракета учиргани муносабати билан шошилинч йиғилиш ўтказиш қарорини танқид қилди.
Баёнотда айтилишича, Корея ярим оролида узлуксиз манёврлар ўтказаётган АҚШнинг айби туфайли, «ушбу минтақада жуда кескин вазият юзага келди». «Бундай шароитларда Пхеньян зарбдор ядро воситаларини кучайтиради ва Вашингтон бундан кейин ҳам халқ республикаси қадр-қимматини ерга урса ва хавфсизлигига путур етказса, АҚШга шафқатсиз зарба беради», — деди ташқи сиёсий муассаса вакили.
Аввалроқ КХДР сув ости кемасидан баллистик ракета учиргани маълум қилинди. Япония мудофаа вазирлиги маълумотларига кўра, ракета тахминан 500 км масофага учиб, Япон денгизига қулади. У биринчи марта мамлакат ҳаво ҳужумига қарши мудофаа идентификация ҳудуди ичкарисига 80 километргача кирди.
Кейинроқ Ким Чен Ин КХДР сув ости кемасидан амалга оширилган ракета парвозини «катта ютуқ» деб атади.
Изоҳ (0)