2020 йилги Олимпиада технологиялар ўчоғи — Японияда бўлиб ўтади. Ташкилотчилар олимпия ўйинлари учун медалларни қайта ишланган смартфон ва бошқа электроникадан ясаш истагини билдирди, деб ёзади «Hi-tech.mail.ru». Нашр зарур миқдордаги мукофотларни ишлаб чиқариш учун нечта телефон керак бўлишини ҳисоблаб чиқди.
Қарийб барча электрон қурилмалар турли-туман металлардан, шу жумладан, кумуш ёки ҳатто олтиндан ташкил топган. Қимматбаҳо элементлар, асосан, қурилманинг электр симлар уланган жойларида ва электрон плато йўлакчаларида бўлади.
CHIP журнали ўтказган тадқиқотга кўра, битта телефонда ўртача 0,25 грамм кумуш ва бор-йўғи 0,024 грамм олтин бўлади.
Ҳар битта олимпиада учун уникал медаллар яратилади, аммо олтин медалнинг ўртача оғирлиги 500 граммга тенг. Бироқ олтин унинг фақат қопламасида қўлланилади ва 6 граммни ташкил этади, медалнинг ичи эса 494 грамм кумушдан иборат. Демак битта мукофотни ясаш учун 2000 га яқин эски телефонни қайта ишлаш керак бўлади.
Мусобақалар учун кўпи билан 170 та олтин медаль тайёрланади. Шу тариқа, 340 мингта телефон қайта ишланса, зарур миқдордаги олтин медаль ясаш учун тилла олинади. Кумуш ва бронза мукофотлар учун эса бир неча миллионта мобил қурилмаларни тўплаш керак бўлади.
Изоҳ (0)