«Юлдузлар жанги» фильмида R2-D2 роботи ролини ижро этган актёр Кенни Бейкер оламдан ўтди

«Юлдузлар жанги» фильмида R2-D2 роботи ролини ижро этган актёр Кенни Бейкер 82 ёшида оламдан ўтди. Бу ҳақда «Корреспондент.net» хабар бермоқда.

Хабарда қайд этилишича, Бейкер узоқ хасталикдан сўнг вафот этди. Сўнгги йилларда актёрни ўпка хасталиги безовта қилиб келганди ва у махсус кресло орқали ҳаракатланишга мажбур бўлган.

Бейкер 1934 йил 24 августда таваллуд топган. 1960- ва 1962 йилларда у кинолардаги эпизодларда илк ролларини ижро этган. Кеннига машҳурлик Жорж Лукаснинг «Юлдузлар жанги»да пайдо бўлганидан сўнг келди.

Бўйи 112 сантиметр бўлган Бейкер R2-D2 роботининг макетига сиғди ва у оригинал фильмнинг барча еттита қисмида суратга тушди. Марҳум актёр Дэвид Линчнинг «Фил-одам» ва Милош Форманнинг «Амадей» фильмларида ҳам суратга тушган.

1970 йилда у Эйлин Бейкерга уйланади ва уларда икки нафар фарзанд дунёга келади. Жуфтлик паканаликдан азият чеккан бўлишига қарамай, бу хасталик уларнинг фарзандларига мерос бўлиб ўтмаган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.