Халқаро космик станцияга сабзавот етиштириш учун оранжерея юборилади

Халқаро космик станцияга сабзавотлар етиштириш мақсадида янги «Lada-2» оранжереяси юборилади. Бу ҳақда «Роскосмос» матбуот хизмати маълум қилди, дея хабар бермоқда «Интерфакс».

«Жорий кузда космик экспедицияга йўл оладиган ‘Роскосмос’нинг космонавтлари — Сергей Рижиков ва Андрей Борисенко янги оранжерея билан ишлаш бўйича ўқитилди. Айнан улар космосда ўсимлик етиштириш бўйича Россия тажрибаларини қайта йўлга қўйиши керак бўлади», — дейилади корпорациянинг Facebook’даги саҳифасида қолдирилган хабарда.

Хабар беришларича, космик станция бортидаги янги оранжереяда дастлаб ширин қалампирнинг пастак нави етиштирилади.

«Космосда шу пайтгача ейиш мумкин бўлган сабзавот етиштирилмаган, шунинг учун ушбу тажрибани инновацион деб ҳисоблаш мумкин. Кейинчалик оранжереяда буғдой етиштирилади», — дея маълум қилди «Роскосмос».

Халқаро космик станцияга оранжереяни 2016 йилнинг охири — 2017 йилнинг боши етказиб бериш режалаштирилган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.