Италиялик мутахассис Клаудио Раньери Англиянинг «Лестер» футбол клуби билан 4 йиллик янги шартнома имзолади. Бу ҳақда жамоа матбуот хизмати маълум қилди, дея хабар беради «ТАСС».
Томонлар ўртасидаги келишув 2020 йил июнигача мўлжалланган. Унинг молиявий томонлари ошкор этилмади.
«Ўтган мавсумда жамоавий руҳ ва оғир меҳнат туфайли мисли кўрилмаган натижага эришдик. Ишга бўлган бундай муносабат билан келгусида ҳам муваффақиятларни қўлга киритиш мумкин. Яна бир неча йил ўзига хос энергияга эга клубнинг бир қисми бўлиб қолишимдан мамнунман ва бундан фахрланаман», — дея таъкидлади Раньери.
Маълумот учун, «Ювентус», «Рома», «Наполи», «Фиорентина», «Интер», «Атлетико», «Валенсия», «Челси» каби клубларни бошқарган италиялик мутахассис 2015 йили «Лестер»ни қабул қилиб олди. Жамоа ўтган мавсумда ўз тарихида илк бор Англия чемпиони бўлди.
Изоҳ (0)