Туриннинг «Ювентус» клуби шарафини ҳимоя қилган франциялик футболчи Поль Погба расман «Манчестер Юнайтед» аъзосига айланди. Бу ҳақда клуб матбуот хизматига таяниб, «Чемпионат» хабар бермоқда.
23 ёшли футболчи тиббий кўрикдан муваффақиятли ўтди ва манкунианлар билан 5 йиллик шартнома имзолади. Келишув яна бир йилга узайтирилиши мумкин.
«Sports.ru»нинг маълум қилишича, «МЮ» Погбанинг трансфери учун 105 миллион евро сарфлади ва бу уни дунёдаги энг қиммат футболчига айлантирди. Бундан аввалги рекорд 2014 йилда «Тоттенхем»дан 100 миллион евро эвазига «Реал»га ўтган Гарет Бэйлга тегишли эди. 2009 йилда «Манчестер Юнайтед»дан 94 миллион евро эвазига «Реал»га ўтган Криштиану Роналду ушбу рўйхатда учинчи ўринни эгаллади.
Маълумот учун, Поль Погба 2012 йили айнан «Манчестер Юнайтед»дан Турин клубига ўтганди. Тўрт йил давомида у «Ювентус» билан тўрт карра Италия чемпиони, икки карра Италия Кубоги ҳамда уч карра Италия Суперкубоги соҳиби бўлди.
Изоҳ (0)