Turinning “Yuventus” klubi sharafini himoya qilgan fransiyalik futbolchi Pol Pogba rasman “Manchester Yunayted” a’zosiga aylandi. Bu haqda klub matbuot xizmatiga tayanib, “Chempionat” xabar bermoqda.

23 yoshli futbolchi tibbiy ko‘rikdan muvaffaqiyatli o‘tdi va mankunianlar bilan 5 yillik shartnoma imzoladi. Kelishuv yana bir yilga uzaytirilishi mumkin.

“Sports.ru”ning ma’lum qilishicha, “MYu” Pogbaning transferi uchun 105 million yevro sarfladi va bu uni dunyodagi eng qimmat futbolchiga aylantirdi. Bundan avvalgi rekord 2014-yilda “Tottenxem”dan 100 million yevro evaziga “Real”ga o‘tgan Garet Beylga tegishli edi. 2009-yilda “Manchester Yunayted”dan 94 million yevro evaziga “Real”ga o‘tgan Krishtianu Ronaldu ushbu ro‘yxatda uchinchi o‘rinni egalladi.

Ma’lumot uchun, Pol Pogba 2012-yili aynan “Manchester Yunayted”dan Turin klubiga o‘tgandi. To‘rt yil davomida u “Yuventus” bilan to‘rt karra Italiya chempioni, ikki karra Italiya Kubogi hamda uch karra Italiya Superkubogi sohibi bo‘ldi.