Рио-де-Жанейро Олимпиадаси учун атаб «Умид» номли қўшиқ ёзган афсонавий футболчи Пеле, йирик спорт фестивалининг очилиш маросимидаги асосий саҳна — Олимпиада машъаласини ёқиш учун расман таклиф олган. Бу ҳақда Пеле Globo телеканалига берган интервьюсида маълум қилди, деб ёзди «ТАСС».
«Бразилия Олимпия Қўмитаси президенти Нузман ва Халқаро Олимпия Қўмитаси президенти Томас Бах менга шахсан мурожаат қилиб, олимпия машъаласини ёқишимни сўрашди. Бироқ мендаги мавжуд шартномага кўра, бу вақтда мен мамлакат ташқарисида бўлишим керак. Агар вазиятни ижобий томонга ўзгартириб, машъалани ёқиш учун етиб кела олсам, бундан фақат хурсанд бўламан», — деб таъкидлаган Пеле.
Пеленинг қайд этишича, бу масала 4 август — пайшанба куни тўлиқ ҳал бўлади. «Маракана» стадионидаги очилиш маросими эса 5 август санасига белгиланган.
Пеле ФИФА талқинига кўра 1999 йилда ХХ асрнинг энг яхши футболчиси деб топилган. ХОҚ эса шу йил уни юз йилликнинг энг яхши спортчиси сифатида тан олган.
Изоҳ (0)