Rio-de-Janeyro Olimpiadasi uchun atab “Umid” nomli qo‘shiq yozgan afsonaviy futbolchi Pele, yirik sport festivalining ochilish marosimidagi asosiy sahna — Olimpiada mash’alasini yoqish uchun rasman taklif olgan. Bu haqda Pele Globo telekanaliga bergan intervyusida ma’lum qildi, deb yozdi “TASS”.
“Braziliya Olimpiya Qo‘mitasi prezidenti Nuzman va Xalqaro Olimpiya Qo‘mitasi prezidenti Tomas Bax menga shaxsan murojaat qilib, olimpiya mash’alasini yoqishimni so‘rashdi. Biroq mendagi mavjud shartnomaga ko‘ra, bu vaqtda men mamlakat tashqarisida bo‘lishim kerak. Agar vaziyatni ijobiy tomonga o‘zgartirib, mash’alani yoqish uchun yetib kela olsam, bundan faqat xursand bo‘laman”, — deb ta’kidlagan Pele.
Pelening qayd etishicha, bu masala 4-avgust — payshanba kuni to‘liq hal bo‘ladi. “Marakana” stadionidagi ochilish marosimi esa 5-avgust sanasiga belgilangan.
Pele FIFA talqiniga ko‘ra 1999-yilda XX asrning eng yaxshi futbolchisi deb topilgan. XOQ esa shu yil uni yuz yillikning eng yaxshi sportchisi sifatida tan olgan.
Izoh (0)