Рио—2016 Олимпиадасида Саудия Арабистонидан 4 нафар аёл спортчи иштирок этадиган бўлди

Саудиялик аёл спортчилар тарихда иккинчи бор Олимпиада беллашувларида иштирок этади, деб ёзди «ТАСС».

Рио—2016 га саудиялик тўрт нафар аёл спортчининг ташриф буюриши ҳақида «ТАСС» France-Presse нашрига таянди. Лондон—2012 Олимпиадасида саудиялик аёл спортчилар сони икки нафарни ташкил қилганди.

Югуриш беллашувларида Сара Ал-Аттор Саудия Арабистони шарафини ҳимоя қилади. У Лондон—2012 Олимпиадасида ҳам иштирок этган бўлиб, маррага қолган рақибаларидан 30 сониялик фарқ билан кечроқ келганди. Риода у марафон беллашувларида омадини синаб кўради.

Олимпиадада дзюдочи Вужуд Фаҳми, қиличбоз Любна Ал-Умар ва яна бир югурувчи Кариман Абу Ад-Жадаил каби аёллар ҳам Саудия номидан қатнашади.

Бу спортчилар Халқаро Олимпия Қўмитаси томонидан махсус таклифнома олган бўлиб, Олимпиада ўйинларининг саралаш босқичларида иштирок этмаган.