Rio—2016 Olimpiadasida Saudiya Arabistonidan 4 nafar ayol sportchi ishtirok etadigan bo‘ldi

Saudiyalik ayol sportchilar tarixda ikkinchi bor Olimpiada bellashuvlarida ishtirok etadi, deb yozdi “TASS”.

Rio—2016 ga saudiyalik to‘rt nafar ayol sportchining tashrif buyurishi haqida “TASS” France-Presse nashriga tayandi. London—2012 Olimpiadasida saudiyalik ayol sportchilar soni ikki nafarni tashkil qilgandi.

Yugurish bellashuvlarida Sara Al-Attor Saudiya Arabistoni sharafini himoya qiladi. U London—2012 Olimpiadasida ham ishtirok etgan bo‘lib, marraga qolgan raqibalaridan 30 soniyalik farq bilan kechroq kelgandi. Rioda u marafon bellashuvlarida omadini sinab ko‘radi.

Olimpiadada dzyudochi Vujud Fahmi, qilichboz Lyubna Al-Umar va yana bir yuguruvchi Kariman Abu Ad-Jadail kabi ayollar ham Saudiya nomidan qatnashadi.

Bu sportchilar Xalqaro Olimpiya Qo‘mitasi tomonidan maxsus taklifnoma olgan bo‘lib, Olimpiada o‘yinlarining saralash bosqichlarida ishtirok etmagan.