Республика болалар ижтимоий кўникма марказида Европа Иттифоқи билан ҳамкорликдаги «Ўзбекистонда махсус эҳтиёжли болалар учун инклюзив таълим» қўшма лойиҳаси доирасида амалга оширилган ишлар натижасига бағишланган медиа-брифинг бўлиб ўтди. Бу ҳақда лойиҳанинг Facebook’даги саҳифасида маълум қилинди.
Марказ директори Васила Алимовага кўра, лойиҳа халқ таълими, олий ва ўрта махсус таълим, соғлиқни сақлаш, меҳнат ва молия вазирликлари билан узвий ҳамкорликда амалга оширилмоқда. Унинг доирасида олий ўқув юртлари талабалари учун инклюзив таълим курси жорий этилди, мазкур таълим бўйича узоқ муддатли миллий стратегия ва 2016—2018 йилларга мўлжалланган ҳаракатлар режаси, шунингдек, болалар ҳуқуқини таъминлашга қаратилган қатор бошқа ҳужжатлар ишлаб чиқилди.
Лойиҳа раҳбари, халқаро эксперт Стефания Алишаускененинг таъкидлашича, 800 нафарга яқин бола одатий боғча ва мактабларда инклюзив таълим курсини ўтаган педагоглар ёрдамида ўқитила бошланди. Бундан ташқари, Ўзбекистоннинг беш минтақасида 5 та ресурс маркази ва 30 та боғча ҳамда мактаб фаолияти йўлга қўйилди. Тошкент вилояти бўйича минтақавий эксперт Дилдора Тўлаганова инклюзив таълимни илгари суришда ота-оналар, жамоатчилик ва педагоглар ўртасида ўзига хос ҳалқа вазифасини ўтовчи ресурс марказлари фаолияти ҳақида ҳикоя қилди.
Брифингда журналистлар лойиҳа экспертларига бевосита саволлар билан мурожаат этиш, инклюзив мактабда биринчи йилни ўтказган болаларнинг ота-оналари билан мулоқот қилиш, улар эришган натижалар билан танишиш имконига эга бўлди.
Изоҳ (0)