Бутунжаҳон бокс ассоциацияси ўзбекистонлик Руслан Чагаевни WBA рейтингидан чиқарди. Бунгача у супероғир вазн тоифасининг чемпионлик камаридан маҳрум қилинганди, деб хабар берди «Оламспорт».
WBA бир неча маротаба Чагаевнинг жамоасига расмий мактуб йўллаб, Окендо билан музокаралар жараёнини бошлашни сўраган, аммо жавоб олмаган. Пуэрто-риколик даъвогар билан ҳимоя жанги ўтказиш бўйича музокаралар учун Чагаевга 120 кун мухлат берилганди.
2014 йилнинг июлида Чагаев Окендо устидан ғалаба қозонган, аммо пуэрто-риколик спортчининг жамоаси жанг шартномасининг бузилишини рўкач қилиб, реванш учрашувининг ўтказилишига эришган эди.
Шу йилнинг 5 март куни Грознийда ўтган учрашувда Чагаев Лукас Браундан 10-раундда мағлубиятга учради. Аммо австралиялик боксчи допинг истеъмол қилганлиги фош этилгач, чемпионлик камари Чагаевга қайтариб берилди.
Чагаев ва унинг жамоасига Фрес Окендога қарши ўтказиладиган мажбурий ҳимоя жангини пайсалга солаётганлик ҳамда ташкилот сўровларига жавоб бермаётганлик айбини қўйилганидан кейин боксчи чемпионлик камаридан маҳрум қилиниб, мана энди рейтингдан ҳам чиқариб юборилди.
Изоҳ (0)