Butunjahon boks assotsiatsiyasi o‘zbekistonlik Ruslan Chagayevni WBA reytingidan chiqardi. Bungacha u superog‘ir vazn toifasining chempionlik kamaridan mahrum qilingandi, deb xabar berdi “Olamsport”.
WBA bir necha marotaba Chagayevning jamoasiga rasmiy maktub yo‘llab, Okendo bilan muzokaralar jarayonini boshlashni so‘ragan, ammo javob olmagan. Puerto-rikolik da’vogar bilan himoya jangi o‘tkazish bo‘yicha muzokaralar uchun Chagayevga 120 kun muxlat berilgandi.
2014-yilning iyulida Chagayev Okendo ustidan g‘alaba qozongan, ammo puerto-rikolik sportchining jamoasi jang shartnomasining buzilishini ro‘kach qilib, revansh uchrashuvining o‘tkazilishiga erishgan edi.
Shu yilning 5-mart kuni Grozniyda o‘tgan uchrashuvda Chagayev Lukas Braundan 10-raundda mag‘lubiyatga uchradi. Ammo avstraliyalik bokschi doping iste’mol qilganligi fosh etilgach, chempionlik kamari Chagayevga qaytarib berildi.
Chagayev va uning jamoasiga Fres Okendoga qarshi o‘tkaziladigan majburiy himoya jangini paysalga solayotganlik hamda tashkilot so‘rovlariga javob bermayotganlik aybini qo‘yilganidan keyin bokschi chempionlik kamaridan mahrum qilinib, mana endi reytingdan ham chiqarib yuborildi.
Izoh (0)