Осиё Чемпионатида Ўзбекистон термасидан енгилиб, финалдан қуруқ қолган Таиланднинг кучига юқори баҳо бериш мумкин. Тошкентдаги ўша учрашувда 2:2 ҳисоби қайд этилганди. Ваҳоланки Таиландда мундиал тажрибаси бор, Ўзбекистонда эса йўқ.
Мундиал сари йўл
Бир эмас тўрт бор футзал бўйича Жаҳон Чемпионатида иштирок этган Таиланд терма жамоаси бу борада кўпчиликнинг олқишига сазовор бўлди. Кейинроқ таиландликлар мундиални ўзларида қабул қилишни истаб қолишди ва 2012 йил бунга муваффақ бўлишди. Сўнгги Жаҳон Чемпионати Осиёда футзали жадал ривожланаётган Таиландга ишониб топширилди.Таиланд терма жамоаси Колумбия—2016 да ўзини кўрсатишга чин дилдан ишонаётган Осиё вакили ҳисобланади. Мундиал йўлида таиландликлар Тошкент мезбонлик қилган Осиё Чемионатига ташриф буюриб, ўз гуруҳларида Вьетнам, Хитой Тайпейи, Тожикистон каби термаларни мағлуб этишди. Австралиянинг 6:1 ҳисобида таслим этилиши эса уларга Колумбия чиптасини тақдим этди. Бу ҳисоб бўйича бешинчи мундиалдир.
Осиё Чемпионатининг финалида ўйнаш учун Таиланд мезбон Ўзбекистон термаси билан тўқнаш келиб қолди. Ўйиннинг асосий вақти 2:2 ҳисобида якунланди, пенальтилар сериясида эса ўзбекистонликларнинг қўли баланд келди. 3-ўрин учун бўлган беллашувда Таиланд Вьетнамга ҳеч қандай имконият қолдирмади — 8:0.
Жамоа ҳақида
Таиланд футзали тўрт йил муқаддам катта ишни амалга оширди. Терма жамоа бош мураббийи этиб голландиялик Виктор Ҳерманс тайинланди. У 2012 йилги Жаҳон Чемпионатига футзалчиларни тайёрлаган ва ҳозир ҳам Таиланд футзал терма жамоасининг бошқарувчиси ҳисобланади. 2012 йилги мундиалда ўзини кўрсатган футзалчилар қаторига ҳозир қатор янги футболчилар келиб қўшилди. Бу борада голландиялик мураббий эскилар ва янгилар ўртасида ажойиб мутоносиблик ярата олди.Жамоанинг асосий фигураси сифатида 26 ёшли Супҳавут Туэнклангни кўрсатиш мумкин. У Осиё Чемпионатида 14 та гол уриб, ҳамманинг бирдек олқишига сазовор бўлган ва тўпурар учун аталган совринни ўзиники қилиб олганди.
Минимумдан максимумга
Жаҳон Чемпионатларидаги дебютини 2000 йилда бошлаган Таиланд терма жамоаси ўша вақтларданоқ Осиёнинг энг яхши жамоаларидан бирига айланиш учун бел боғлаганди. Бу ҳолат Таиланд терма жамоасига кейинги мундиалларда ҳам мунтазам иштирок этиш имконини берди. Натижалар эса йилдан йилга яхшиланиб борди.
Масалан 2000 йилги Жаҳон Чемпионатини Таиланд гуруҳ босқичидаёқ якунлади. 2004 ва 2008 йилга келиб эса 1/8 финалга қадар етиб борди. Ўзи мезбонлик қилган 2012 йилги мундиалда Таиланд бўлажак финалчи Испаниядангина мағлуб бўлганди.
Изоҳ (0)