АҚШ 23 июль, шанба куни Кобулда юз бериб, 80 кишининг ўлимига сабабчи бўлган терактни қоралайди ва уни текширишда Афғонистон ҳукуматига ҳар қандай ёрдамни тақдим этишга тайёр. Бу ҳақда АҚШ Давлат департаменти матбуот котиби Жон Кирби маълум қилди, деб ёзади «ТАСС».
«АҚШ ўнлаб афғонистонликларнинг ўлимига сабаб бўлган, яна кўпчиликка жароҳат етказган шафқатсиз ҳужумни қатъий тарзда қоралайди», — деди Кирби. «Қурбонлар ва яраланганларнинг яқинларига чуқур ҳамдардлик изҳор этамиз ҳамда Афғонистон президенти Ашраф Ғанига ҳукумат томонидан олиб борилаётган текширув ва ушбу қотилларни жавобгарликка тортишда зарур бўлиши мумкин бўлган ҳар қандай ёрдамни таклиф қиламиз», — дея қўшимча қилди Давлат департаменти вакили.
Кирби, шу билан бирга, теракт ташкилотчилари учун Афғонистон келажагида ўрин йўқлигини қайд этди.
23 июль куни Афғонистон пойтахти Кобулда уч экстремист намойишчилар оломони ичига кириб олди. Улардан икки нафари эгнидаги портловчи ускунани ҳаракатга келтирди, учинчиси эса полициячилар томонидан ўлдирилди. Портлаш оқибатида 80 киши ҳалок бўлди, 230 киши жароҳатланди.
Изоҳ (0)