AQSh 23-iyul, shanba kuni Kobulda yuz berib, 80 kishining o‘limiga sababchi bo‘lgan teraktni qoralaydi va uni tekshirishda Afg‘oniston hukumatiga har qanday yordamni taqdim etishga tayyor. Bu haqda AQSh Davlat departamenti matbuot kotibi Jon Kirbi ma’lum qildi, deb yozadi “TASS”.
“AQSh o‘nlab afg‘onistonliklarning o‘limiga sabab bo‘lgan, yana ko‘pchilikka jarohat yetkazgan shafqatsiz hujumni qat’iy tarzda qoralaydi”, — dedi Kirbi. “Qurbonlar va yaralanganlarning yaqinlariga chuqur hamdardlik izhor etamiz hamda Afg‘oniston prezidenti Ashraf G‘aniga hukumat tomonidan olib borilayotgan tekshiruv va ushbu qotillarni javobgarlikka tortishda zarur bo‘lishi mumkin bo‘lgan har qanday yordamni taklif qilamiz”, — deya qo‘shimcha qildi Davlat departamenti vakili.
Kirbi, shu bilan birga, terakt tashkilotchilari uchun Afg‘oniston kelajagida o‘rin yo‘qligini qayd etdi.
23-iyul kuni Afg‘oniston poytaxti Kobulda uch ekstremist namoyishchilar olomoni ichiga kirib oldi. Ulardan ikki nafari egnidagi portlovchi uskunani harakatga keltirdi, uchinchisi esa politsiyachilar tomonidan o‘ldirildi. Portlash oqibatida 80 kishi halok bo‘ldi, 230 kishi jarohatlandi.
Izoh (0)