Дастурчи Аҳмад ал-Мутава оммабоп Pokemon Go онлайн-ўйинига бузиб кириб, берилган координаталар яқинида жойлашган ва Google Maps’да акс этадиган барча виртуал покемонларни топди, деб ёзади Afisha. Бу ҳақда у IT-лойиҳалар хостинги учун GitHub махсус виртуал сервисида гапириб берди ва у ерга Pokemon Go учун скриптнинг бошланғич кодини жойлади.
Ал-Мутава Pokemon Go’га бошланғич скрипт коди ёрдамида бузиб кириш жараёнини қадам-бақадам тушунтириб берди. Pokemon Go сервер ҳар қандай координаталардан берилган сўровга жавобан яқин орада жойлашган барча «чўнтак махлуқлари»нинг жойлашган ўрни ҳақидаги маълумотларни очиқдан-очиқ жўнатиши туфайли, поке-мастерлар учун лайфхак яратиш мумкин бўлди.
Нашр таъкидлашича, бу «усул» узоққа бормайди. Ўйинни ишлаб чиқувчилар покемон овчилари ҳалол ўйнаши устидан назорат қилади. Чунончи, уйдан чиқмай ўйнаш учун сохта GPS-маълумотлардан фойдаланадиган ўйинчилар блоклаб қўйилади.
Pokemon Go — 2016 йилда чиқарилган бирйўла кўп фойдаланувчилар билан бирга ўйналадиган ўйин. Унинг мақсади покемонларни қидириш ва қўлга ўргатишдан иборат. Ўйинга тўлдирилган реаллик элементлари киритилган, унда рақамли ва реал олам қўшилиб кетади: смартфон экранидаги расм реал оламдаги объектларда акс этади. Айни пайтда ўйин 15 миллион мартадан кўпроқ юклаб олинди, ундан ҳар куни 20 миллион киши фойдаланади.
Изоҳ (0)