Беларусь президенти Александр Лукашенко мамлакат фуқароларини «Арманистон ёки Қозоғистондаги каби» тартибсизликларни амалга оширмасликка чақирди, деб ёзади «РБК». «Бизга бу керак эмас», — деди президент.
«Бу юқумли касаллик», — деди Лукашенко. Унинг қўшимча қилишича, «касаллик» жамоатчилик ичига кириб қолса, тезлик билан тарқалиб кетади. Лукашенконинг сўзларига кўра, буни таг-туби билан йўқ қилиш учун «кўп куч, маблағ ва, худо кўрсатмасин, жон» талаб қилинади.
«Ҳеч қачон ҳеч нарсадан қўрқманг, менга истаган кишингиз ҳақида гапиринг, бироқ ёдда тутинг, Туркиядаги каби президент ва ҳукуматга қарши фақат сайловларда ‘курашиш’ мумкин», — деди давлат раҳбари. У Беларусь аҳолиси парламент ва президент сайловларида истаганидек овоз бериш ҳуқуқига эга эканлигини таъкидлади.
16 июлга ўтар кечаси Туркияда давлатни тўнтаришга уриниш муваффақиятсиз якунланди, у ҳукумат томонидан бостирилди. Натижада 246 киши ҳалок бўлди, 2185 киши яраланди.
Арманистон пойтахти Ереванда эса 21 июлга ўтар кечаси намойишчилар ва полициячилар ўртасида тўқнашув бўлиб ўтди. Митингда қатнашаётганлар 17 июль куни эгаллаб олинган полиция патруль-пост хизмати биносига ёриб киришга уринди. Тўқнашувлар чоғида 45 киши жабрланди.
Қозоғистоннинг Олмаота шаҳри марказида 18 июль куни эрталаб полициячилар ўққа тутилди. Отишма чоғида тўрт полициячи ҳалок бўлди, қурбонларнинг умумий сони олти кишини ташкил қилди.
Изоҳ (0)