Belarus prezidenti Aleksandr Lukashenko mamlakat fuqarolarini “Armaniston yoki Qozog‘istondagi kabi” tartibsizliklarni amalga oshirmaslikka chaqirdi, deb yozadi “RBK”. “Bizga bu kerak emas”, — dedi prezident.
“Bu yuqumli kasallik”, — dedi Lukashenko. Uning qo‘shimcha qilishicha, “kasallik” jamoatchilik ichiga kirib qolsa, tezlik bilan tarqalib ketadi. Lukashenkoning so‘zlariga ko‘ra, buni tag-tubi bilan yo‘q qilish uchun “ko‘p kuch, mablag‘ va, xudo ko‘rsatmasin, jon” talab qilinadi.
“Hech qachon hech narsadan qo‘rqmang, menga istagan kishingiz haqida gapiring, biroq yodda tuting, Turkiyadagi kabi prezident va hukumatga qarshi faqat saylovlarda ‘kurashish’ mumkin”, — dedi davlat rahbari. U Belarus aholisi parlament va prezident saylovlarida istaganidek ovoz berish huquqiga ega ekanligini ta’kidladi.
16-iyulga o‘tar kechasi Turkiyada davlatni to‘ntarishga urinish muvaffaqiyatsiz yakunlandi, u hukumat tomonidan bostirildi. Natijada 246 kishi halok bo‘ldi, 2185 kishi yaralandi.
Armaniston poytaxti Yerevanda esa 21-iyulga o‘tar kechasi namoyishchilar va politsiyachilar o‘rtasida to‘qnashuv bo‘lib o‘tdi. Mitingda qatnashayotganlar 17-iyul kuni egallab olingan politsiya patrul-post xizmati binosiga yorib kirishga urindi. To‘qnashuvlar chog‘ida 45 kishi jabrlandi.
Qozog‘istonning Olmaota shahri markazida 18-iyul kuni ertalab politsiyachilar o‘qqa tutildi. Otishma chog‘ida to‘rt politsiyachi halok bo‘ldi, qurbonlarning umumiy soni olti kishini tashkil qildi.
Izoh (0)