Алишер Усмонов Сардинияда дунёдаги энг катта яхтанинг денгизга чиқишини нишонлади
Россиялик миллиардер Алишер Усмоновга тегишли 545 миллион евролик (600 миллион доллар) яхта биринчи марта денгизга чиқарилди. Бунга бағишланган тантанали маросим Сардиния оролида ўтказилди. Шоуда иштирок этиш учун халқаро миқёсда машҳур санъаткорлар — Робби Уильямс, Андреа Бочелли, Шарль Азнавур ва Карла Бруни таклиф этилди, деб хабар беради ABC.
Forbes версияси бўйича Россиянинг энг бадавлат инсонлари орасида 3-ўринда турувчи Алишер Усмонов дунёдаги энг катта деб баҳоланаётган яхтани онасининг шарафига «Дилбар» деб атаган. «Дилбар» 156 метр узунликка, 23 метр кенгликка, 30 метр баландликка, 3800 квадрат метр яшаш майдонига эга. Унинг тезлиги 22,5 узелга чиқади. Яхта узунлиги бўйича жаҳонда 4-ўринда, тоннажи бўйича эса 1-ўринда: 15 917 тонналик сув транспорти бу кўрсаткич бўйича илгариги рекордчи — Уммон султонига қарашли 15 850 тонналик Al Said яхтасидан ўзиб кетди. Яхта 80 кишилик экипажга мўлжалланган.
