АҚШ президенти Барак Обама энг яқин вақтлар ичида телефон орқали Туркия президенти Ражаб Тоййиб Эрдўғон билан суҳбатлашмоқчи. Бу ҳақда Оқ уй матбуот котиби Жош Эрнест брифингда журналистларга маълум қилди, деб ёзади «ТАСС».
«Бу жуда тез орада бўлиб ўтади, деб ўйлайман», — деди у бўлғуси суҳбатнинг санасига аниқлик киритмаган ҳолда.
Эрнестнинг эслатишича, икки етакчи яқинда Варшавадаги НАТО саммитида мулоқот қилган, ундан аввал эса Вашингтонда ядро хавфсизлиги саммитида учрашган эди.
16 июлга ўтар кечаси Туркияда исёнчилар гуруҳи ҳарбий тўнтаришни амалга оширишга уринди. Асосий қўзғолонлар Истанбул ва Анқарада бўлиб ўтди. Мамлакат раҳбарияти фитна даф қилинганини эълон қилди. Сўнгги маълумотларга кўра, 208 нафар фуқаро ҳалок бўлди, 100 нафар исёнчи ўлдирилди, 1,5 мингга яқин киши эса яраланди.
Изоҳ (0)