АҚШ раҳбарлигидаги террорчиликка қарши халқаро коалиция 17 июль, якшанба куни Туркиянинг Инжирлик авиабазасидан операциялар ўтказишни қайта бошлади, деб ёзади «ТАСС» Пентагон матбуот котиби Питер Кукка таяниб.
«Туркиялик иттифоқдошларимиз билан яқин ҳамкорликдан сўнг, ИШИДга қарши коалициянинг Туркия ҳудудидан олиб бориладиган ҳаво операциялари янгиланди», — дея таъкидлади у.
Қайд этилишича, Американинг Инжирлик базасидаги объектлари ҳамон ички электр таъминот манбалари орқали ишламоқда. «Биз электр таъминотни энг қисқа муддатларда қайта тиклашни мўлжалламоқдамиз. Бу база фаолиятига ҳеч қандай таъсир ўтказгани йўқ», — деди Кук.
Аввалроқ Туркия жанубида жойлашган Инжирлик ҳарбий базаси қўмондони давлат тўнтаришига алоқадорликда айбланиб қўлга олингани хабар берилди. Айрим ОАВ Инжирлик базаси тўнтаришга уринишдан сўнг ёпилгани, шунингдек, ташқи электр таъминотидан узилганини билдирганди. Ушбу базада Суриядаги террорчилар марраларига зарбалар учун фойдаланиладиган АҚШ, Буюк Британия, Германия, Саудия Арабистони ва Қатар авиацияси жойлаштирилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)