АҚШ давлат котиби Жон Керри 1990 йиллар охиридан бери АҚШда истиқомат қилиб келаётган собиқ имом Фатҳуллоҳ Гулен Туркияда 16 июлга ўтар кечаси юз берган ҳарбий тўнтаришга уринишга алоқадор эканлигини тасдиқловчи далилларни тақдим этишни Туркиядан талаб қилди. Бу ҳақда «Интерфакс» хабар бермоқда.
16 июлга ўтар кечаси ҳарбийлар Туркиядаги ҳокимиятни ўз қўлига олишга уриниб кўрди. Мамлакат президенти Ражаб Тоййиб Эрдўғон эса ўз тарафдорларини кўчаларга чиқишга чақирди. Тонгга яқин Туркия ҳукумати мамлакатдаги вазият назорат остига олинганини маълум қилди. Исёнчиларни қўлга олиш ишлари давом этмоқда, ҳалок бўлганлар ва яраланганлар бор.
Айни вақтда, Эрдўғон ҳам, Туркия бош вазири Бинали Йилдирим ҳам тўнтаришга уринишни чет элдан туриб Фатҳуллоҳ Гулен уюштиришга уринган бўлиши мумкин, деб фикр билдирди.
Собиқ имомнинг ўзи эса унга қўйилаётган барча айбловларни рад этмоқда ва аксилконституциявий тўнтаришни қўллаб-қувватламаслигини билдирмоқда.
Керрининг қайд этишича, АҚШ расмий Анқарадан Гуленни экстрадиция қилиш ҳақида ҳеч қандай сўров олмаган (аввалроқ Бинали Йилдирим шундай сўров АҚШга йўллангани ҳақида айтиб ўтган эди).
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)