AQSh davlat kotibi Jon Kerri 1990-yillar oxiridan beri AQShda istiqomat qilib kelayotgan sobiq imom Fathulloh Gulen Turkiyada 16-iyulga o‘tar kechasi yuz bergan harbiy to‘ntarishga urinishga aloqador ekanligini tasdiqlovchi dalillarni taqdim etishni Turkiyadan talab qildi. Bu haqda “Interfaks” xabar bermoqda.
16-iyulga o‘tar kechasi harbiylar Turkiyadagi hokimiyatni o‘z qo‘liga olishga urinib ko‘rdi. Mamlakat prezidenti Rajab Toyyib Erdo‘g‘on esa o‘z tarafdorlarini ko‘chalarga chiqishga chaqirdi. Tongga yaqin Turkiya hukumati mamlakatdagi vaziyat nazorat ostiga olinganini ma’lum qildi. Isyonchilarni qo‘lga olish ishlari davom etmoqda, halok bo‘lganlar va yaralanganlar bor.
Ayni vaqtda, Erdo‘g‘on ham, Turkiya bosh vaziri Binali Yildirim ham to‘ntarishga urinishni chet eldan turib Fathulloh Gulen uyushtirishga uringan bo‘lishi mumkin, deb fikr bildirdi.
Sobiq imomning o‘zi esa unga qo‘yilayotgan barcha ayblovlarni rad etmoqda va aksilkonstitutsiyaviy to‘ntarishni qo‘llab-quvvatlamasligini bildirmoqda.
Kerrining qayd etishicha, AQSh rasmiy Anqaradan Gulenni ekstraditsiya qilish haqida hech qanday so‘rov olmagan (avvalroq Binali Yildirim shunday so‘rov AQShga yo‘llangani haqida aytib o‘tgan edi).
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)