Расмий Анқара мамлакатда 16 июлга ўтар кечаси юз берган ҳарбий тўнтариш Фатҳуллоҳ Гулен томонидан уюштирилган деб ҳисобламоқда; уни яшираётган ҳар қандай мамлакат ўзини Туркияга дўст деб ҳисоблай олмайди. Мазкур баёнот, «Интерфакс» хабарига кўра, Туркия бош вазири Бинали Йилдирим томонидан берилган.
Туркия президенти Ражаб Тоййиб Эрдўғоннинг азалий рақиби ҳисоблан Фатҳуллоҳ Гулен 1990 йилларнинг охиридан бери АҚШда истиқомат қилади. Hurriyet нашрининг ёзишича, расмий Анқара мазкур баёноти билан АҚШга ўзига хос сигнал йўлламоқда.
«Террорчиларнинг етакчиси ҳисобланган бу одамни, айниқса кечаги воқеалардан сўнг, қандай мамлакат қўллаб-қувватлаши мумкинлигини ақлимга сиғдира олмайман. Уни қўллаб-қувватлайдиган мамлакат Туркиянинг дўсти эмаслиги аниқ. Бу Туркияга қарши душманона қадамдир», — деди Туркия ҳукумати раҳбари.
Йилдиримнинг таъкидлашича, Туркия аввал ҳам Гуленни экстрадиция қилиш ҳақида сўров йўллаган. Собиқ имом ҳисобланган Гуленнинг ўзи эса ҳарбий тўнтаришга уринишга алоқадорлиги ҳақидаги айбловларни рад этиб, тўнтариш тарафдорларини қатъий қоралаган эди.
Изоҳ (0)