Фото: Давлат рақам белгиси ўрнига исм ёзилган Фарғонадаги Lacetti

Facebook’даги «Водители Ташкента (Drivers.uz)» гуруҳида Фарғонада давлат рақам белгисисиз ҳаракатланаётган Lacetti сурати эълон қилинди.

Эътиборли томони, автомобилнинг давлат рақам белгиси ўрнига бошқа лавҳа ўрнатилган бўлиб, унга «Дима Баҳромович» (оригиналида — DiMa Bakhromovich) деб ёзилган.

Сурат Lacetti’нинг орқа томонидан олинган. Машинанинг олд рақам белгиси ҳам ўзгартирилганми-йўқми, номаълум. Мазкур фотохабарга қолдирилган изоҳда жумладан шундай дейилган: «Борар манзили — жарима майдончаси».

Маълумот учун, Маъмурий жавобгарлик тўғрисидаги кодекснинг 125-моддаси 5-қисмига мувофиқ, давлат рақам белгиси ўзбошимчалик билан ечиб олинган транспорт воситаларини бошқариш энг кам иш ҳақининг беш баравари (13 июль ҳолатига кўра — 651 200 сўм) миқдорида жарима солинишига сабаб бўлади.

Айни вақтда, давлат рақам белгиси ясама ёки ўзга усулларда ўзгартирилган транспорт воситаларини, худди шунингдек, давлат рақам белгиси айни шу транспорт воситасига тегишли бўлмаган транспорт воситасини бошқариш энг кам иш ҳақининг ўн баравари (1 302 400 сўм) сўм миқдорида жарима солинишига сабаб бўлади.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.