Ижтимоий тармоқлар ёрдамида киши ҳақида кўплаб маълумотга эга бўлиш мумкин, деб ёзади «Hi-tech.mail.ru». Бунинг учун жосус бўлиш шарт эмас — шунчаки кузатувчан бўлиш етарли, холос.
Future Today ўтказган сўров натижаларига кўра, иш берувчиларнинг 65 фоизи ишга даъвогарларни баҳолаш учун номзодларнинг ижтимоий тармоқлардаги профилларини ўрганади ва тўпланган маълумот асосида қарор қабул қилади.
Банклар эса кредит олишга келган мижознинг тўлай олиш қобилиятини баҳолаш мақсадида ижтимоий тармоқлардан фойдаланади. Банк терминологиясида бу скоринг деб аталади. Скоринг учун махсус дастурлар яратилган бўлиб, улар инсон ҳаётидаги ҳодисалар — ишдан кетиш, ажралиш ва бошқаларни кузатиб боради.
Маркетологлар ижтимоий тармоқлардан сизнинг қизиқишларингиз, одатларингиз ва эҳтиёжларингиз ҳақида ахборот олади. Булардан хабардор бўлган ҳолда, уларнинг сизга нимадир сотиши осонроқ кечади.
Фирибгарлар эса ижтимоий тармоқларни ўзларининг алдам-қалдам ишлари йўлида қўллайди. Бунга энг оддий мисол: самолётга чиқиш талони суратини интернетга жойлаган бўлсангиз, улар сиз таътилга кетганингизни англайди. Демак сиз маълум вақт уйда бўлмайсиз — уйингизга ўғриликка тушиш ёки автомобилни олиб қочиш осонлашади. Ахир ижтимоий тармоққа автомобилингизнинг суратини ҳам уни кўз-кўз қилиш мақсадида жойлагандирсиз?
Буларнинг барчаси сиз билан содир бўлмаслиги учун ижтимоий тармоққа қандай расм қўяётганингиз, нима деб ёзаётганингизга эътиборлироқ ёндашинг. EXIF (тасвирларга у ҳақда қўшимча маълумот қўшиш имконини берувчи стандарт) маълумотларга эга фотосуратларни жойламанг.
Шунингдек, «Сиз қандай жониворсиз?»га ўхшаш «жиннича» тестлардан ўтманг, ахир шу тариқа, сиз бундай дастурлар учун ўз профилингизга йўл очиб берасиз.
Потенциал иш берувчи томонидан сизга қарши қўлланилиши мумкин бўлган ахборотни ҳам ижтимоий тармоққа жойламаганингиз маъқул. Айниқса, шахсий маълумотларни ошкор қилишдан эҳтиёт бўлинг, буларга, юқорида айтиб ўтилганидек, уйингизда ҳеч ким йўқлигидан дарак берувчи самолёт чиптаси ҳам киради.
Изоҳ (0)