Футбол бўйича Португалия терма жамоаси ҳужумчиси Криштиану Роналду Францияга қарши Евро–2016 турнири финал учрашуви олдидан ўз фикрларини билдириб ўтди, деб хабар бермоқда «Sports.ru».
«Назаримда, Франция термаси – фаворит. Улар ўз уйида ўйнамоқда ва бу катта устунлик беради. Бутун мамлакат Францияни қўллаб-қувватлайди. Аммо бу финал ва бу ерда ҳамма нарса бўлиши мумкин. Биз тайёр турамиз, бизни енгиш осон бўлмайди. Португалия термасини ушбу турнирда ҳеч ким мағлуб қилмади, францияликлар ҳам бунинг уддасидан чиқа олмаслигига умид қиламан.
Агар терма жамоа сафида соврин ютсам, мен учун катта муваффақият бўлади. Мен бу ҳақда доим орзу қилганман. Мен ғалабага ишонаман. Жамоадошларим, бутун Португалия ва Франциядаги португалияликлар ҳам бунга ишонади. Ажойиб ҳиссиётларни ва хурсандчиликни ҳис қиляпман. Яна бир бор финалга чиқишни хоҳлагандим», – деди Роналду.
Португалия ва Франция терма жамоалари ўртасидаги Евро–2016 финал баҳси 10 июль, Тошкент вақти билан 23:59 да бошланади.
Изоҳ (0)