Futbol bo‘yicha Portugaliya terma jamoasi hujumchisi Krishtianu Ronaldu Fransiyaga qarshi Yevro–2016 turniri final uchrashuvi oldidan o‘z fikrlarini bildirib o‘tdi, deb xabar bermoqda “Sports.ru”.
“Nazarimda, Fransiya termasi – favorit. Ular o‘z uyida o‘ynamoqda va bu katta ustunlik beradi. Butun mamlakat Fransiyani qo‘llab-quvvatlaydi. Ammo bu final va bu yerda hamma narsa bo‘lishi mumkin. Biz tayyor turamiz, bizni yengish oson bo‘lmaydi. Portugaliya termasini ushbu turnirda hech kim mag‘lub qilmadi, fransiyaliklar ham buning uddasidan chiqa olmasligiga umid qilaman.
Agar terma jamoa safida sovrin yutsam, men uchun katta muvaffaqiyat bo‘ladi. Men bu haqda doim orzu qilganman. Men g‘alabaga ishonaman. Jamoadoshlarim, butun Portugaliya va Fransiyadagi portugaliyaliklar ham bunga ishonadi. Ajoyib hissiyotlarni va xursandchilikni his qilyapman. Yana bir bor finalga chiqishni xohlagandim”, – dedi Ronaldu.
Portugaliya va Fransiya terma jamoalari o‘rtasidagi Yevro–2016 final bahsi 10-iyul, Toshkent vaqti bilan 23:59 da boshlanadi.
Izoh (0)