Жанубий Судан президенти Сальва Киирга хизмат қилувчи ҳарбийларнинг камида 5 нафари мамлакат пойтахти Жубада исёнчилар билан бўлиб ўтган тўқнашувлар оқибатида ҳалок бўлди. Бу ҳақда AFP агентлигига таяниб, «ТАСС» хабар бермоқда.
«Биздаги маълумотларга кўра, беш нафар ҳарбий ҳалок бўлди, яна икки нафари жароҳатланди», – деб маълум қилди мамлакат вице-президенти матбуот котиби. Кейинроқ Жанубий Судан мудофаа вазири Киол Маньянг ҳам ушбу маълумотни тасдиқлади.
2013 йил декабрида Сальва Киир қўзғалончиларнинг собиқ етакчиси, ўзининг ўринбосари Риек Машарнинг лавозимидан бўшатиши Жанубий Суданда можаронинг келиб чиқишига сабаб бўлди. Икки сиёсатчи ўртасидаги қарама-қаршилик туфайли уларнинг тарафдорлари, икки хил миллат вакиллари ўртасида тўқнашувлар содир бўлиши тезлик билан авж олди. Бунинг натижасида 10 мингга яқин киши ҳалок бўлди, 2,2 миллион аҳоли қочоққа айланди.
2015 йилнинг август ойида Киир ва Машар тинчлик келишувини имзолади. Шу йилнинг январь ойидан бошлаб улар миллий бирлик ўтиш ҳукумати тузишга келишиб олди. 26 апрель куни Машар вице-президент лавозимига қайта ўтиш учун мамлакат пойтахти Жуба шаҳрида қасамёд келтирди.
28 апрель куни президент ҳукуматнинг янги таркибини эълон қилди. Унга кўра, Киирнинг партияси Мудофаа ва Молия вазирликларини, Машар тарафдорлари эса Ички ишлар вазирлиги ва нефть ишларини бошқаради. Қолган мухолифатчилар Ташқи ишлар вазирлиги ва Қишлоқ хўжалиги вазирликларини бошқаради. Янги маҳкама 24 июнь куни қасамёд қилганди.
Изоҳ (0)